وہ جو رنگ برنگی تتلی ہے ناں
وہ جو رنگ برنگی تتلی ہے ناں
اسے اڑنے دو
دور گگن میں
کسی باغ کی اونچی ٹہنی تک
کسی باز کے جھپٹے میں آتے ہوئے غوطہ کھانے تک
اسے اڑنے دو
اسے اپنے پنکھ پھیلا کر
ہوا میں چھپی خوشبو محسوس کرنے دو
اسے کسی پھول کا رس چوس کر
دل بھرنے تک
جھومنے دو
وہ جو رنگ برنگی تتلی ہے ناں
اسے اڑنے دو
اسے بے خوف رہنے دو
رنگ اڑنے کے خوف سے آزادی دے دو
اسے جینے دو
زندہ رہنے دو
اسے اپنی مرضی کر لینے دو
اسے کہہ دو
تم جہاں جانا چاہو آزاد ہو
جائو جی لو اپنی زندگی
جائو اپنے رنگوں سے جہان کو رنگ دو
جائو اپنی مرضی کا آسمان چن لو
جائو اپنی خوشی کی روشنی سے جہان کو روشن کردو
وہ جو رنگ برنگی تتلی ہے ناں
اسے اڑنے دو
اسے اڑنے دو جہاں تک وہ چاہے
اسے اڑنے دو جب تک اس کا دل چاہے
اسے بتائو کہ آسمان تمہارا ہے
سارا جہان تمہارا ہے
اسے کہو کہ اڑتی جائو
جب تک تھک نہ جائو
جتنی اونچائیوں کو چھو سکتی ہو
چھو کے آئو
ہم یہیں سے دیکھیں گے
تمہیں اڑتا ہوا
اونچائی چھوتا ہوا
تمہارے کرتب محسوس کریں گے
تمہارے ساتھ ہمیشہ رہیں گے
وہ جو رنگ برنگی تتلی ہے ناں اسے اڑنے دو
#butterfly
#urdu
#poem
#urduwriter